NADAL

  Hoxe tivemos unha xornada de festa chea de emocións, actividades compartidas, baile, visita de Papa Noel e chocolatada. Tamén despedimos a Aroa, que nos acompañou neste trimestre. Moitas grazas polo teu cariño e adicación e moita sorte!

FELICES FESTAS!

Pinchade na imaxe para ver as fotos  

PROGRAMA TEI: NOS SEUS ZAPATOS

Nos seus zapatos é unha actividade do Programa TEI, que ten como obxectivo valorarse positivamente, tanto a un mesmo como ao que se ten, aprendendo a importancia da actitude coa que se enfrontan as dificultades e de saber poñerse no lugar dos demais.

A partires dun vídeo, os nenos e nenas reflexionaron por grupos para despois poñer en común as súas conclusións.  Despois foron apuntando durante a semana esas cousas positivas, que nos fan felices ou que nos fan sentir ben. Continuaremos traballando este tema nas próximas semanas.

EXPOSICIÓN SADABONA

 Hoxe visitamos a exposición de Sadabona deste trimestre e puidemos ver o traballo de todo o centro e tamén do noso curso sobre interculturalidade.

 Recollemos algunhas das moitas cousas que aprendemos sobre nós mesmos e as nosas  raíces.

 

Pinchade na imaxe para ver as fotos da visita

FELIZ ANIVERSARIO!

 

FELIZ ANIVERSARIO!

 

PROXECTO SADABONA: REPÚBLICA DOMINICANA

 Continuamos coa viaxe polas nosas raíces, visitando República Dominicana con Ana, a nai de Antony; cruzamos o Atlántico para chegar a esta illa tan bonita e con tantas paisaxes paradisíacas.

Ana fixo un percorrido polos feitos máis importantes da historia deste país e o significado da súa bandeira e do seu escudo. E aprendemos cousas moi interesantes, como que a illa que comparten Haití e República Dominicana foi descuberta por Cristóbal Colón na súa primeira viaxe a América.

E sabíades que o establecemento do 25 N como Día Internacional da eliminación da violencia contra a muller, ten a súa orixe na historia das irmás Mirabal, tres mulleres loitadoras da República Dominicana?

Tamén nos falaron da súa gastronomía, monumentos e praias, como a Praia de Arroyo Salado, que tanto lle gusta a Antony visitar.

Pero o que máis lle gusta a Antony , e dos que sabe moitas cousas, son os animais, por iso contounos  que todos os anos miles de baleas achéganse ás augas cálidas da República Dominicana para ter as súas crías; a baía de Samaná convírtese así nun dos escenarios máis espectaculares da natureza.

Tiñamos como sempre moitas preguntas e curiosidades que foron contestando, e, para rematar, un pouco de música dominicana. 

Unha visita moi interesante, que nos encantou! Moitísimas grazas pola colaboración e parabéns!

Pinchade na imaxe para ver algunhas fotos da sesión

PROXECTO SADABONA: SENEGAL

 Hoxe cotinuamos na nosa viaxe do Proxecto Sadabona coñecendo Senegal, coa visita do irmán de Fara, Birame, e o seu curmán, Ibra. 

Faláronnos de como é a vida neste país africano e contáronnos moitas cousas interesantes da súa cultura. Tiñamos tantas preguntas preparadas que se nos fixo moi curto!

Coñecemos o importantes que son os baobabs para os senegaleses, as árbores da vida, que lles proporcionan comida, auga, refuxio e roupa. Son considerados como un símbolo de prosperidade, tradición e raíces milenarias e por iso aparece no seu escudo. Tamén aparece o león, un animal admirado como símbolo de fortaleza e valentía.

Faláronnos das súas casas, da escola, das tradicións, do traballo... A súa familia adícase, sobre todo, á pesca, xa que viven moi preto do  mar.

Tamén nos amosaron que o deporte nacional é a loita senegalesa, que é tan importante para eles como o fútbol para nós.

 

 

E, finalmente,

 faláronnos do wolof, 

e ensináronnos palabras nesta lingua; 

de seguro que aprenderemos

 moitas máis con Fara...

 

 

 

 

 

 

 

 

 

Moitísimas grazas por esta visita tan interesante na que aprendemos moitísimo de Senegal! Parabéns!

Pinchade na imaxe para ver as fotos da sesión

CARREIRA ENKI

 Para conmemorar o Día Internacional das persoas con  Discapacidade, hoxe celebramos a CARREIRA ENKI, unha actividade lúdica e non competitiva, que promove a inclusión e a visualización das persoas con diversidad funcional.

Primeiro participamos na carreira e despois tocounos axudar na realización das probas na quenda dos maiores. Fixémolo xenial e pasámolo moi ben!

 Pinchade na imaxe para ver as fotos e vídeos da actividade.

FACEMOS ANIMAIS COAS PEZAS DO TANGRAM

 Sodes uns e unhas artistas!

Pinchade na imaxe

 

ROBÓTICA: REPASAMOS OS ANIMAIS CO TALE-BOT

 Hoxe realizamos unha actividade de robótica, na que empregamos o TALE-BOT para repasar o aprendido dos animais vertebrados e invertebrados. Xogamos e aprendemos e dásenos moi ben!

 Pinchade  na imaxe para ver as fotos da sesión.

 

PROXECTO SADABONA: MÚSICA E CULTURA GALEGA

 Dentro das actividades que estamos realizando na clase, coa colaboración das familias, para o Proxecto Sadabona, hoxe tocoulle á nosa terra, Galicia. Visitáronnos María, a nai de Icía, e Eva, a nai de Laila, unha compañeira de sexto curso.  Ámbalas dúas son pandereiteiras e quixeron compartir connosco un anaco de tradición, cultura e música galega. 

Foi precioso escoitar as historias que nos contaron sobre os instrumentos chamados "pobres" e a súa orixe; os contos de labregos, lareiras e tantas tradicións transmitidas polos nosos avós e avoas... 

 Aprendemos que facían música coas cousas que tiñan á man, ata co sacho co que traballaban a terra,  e puidemos probar a tocar coas culleres, as latas de pimentón, as cunchas, a botella de anís...

 Tamén nos ensinaron instrumentos tradicionais, como o pandeiro e a pandeireta.

Disfrutamos moito  coa súa música e as súas cancións!

E ata nos trouxeron o noso diploma de percusión tradicional personalizado, co que xa semella que estamos preparados para ser transmisores orais da cultura musical galega. Por iso, xa sabedes, a manter vivas as nosas tradicións!

Moitísimas grazas por este obradoiro tan bonito e enriquecedor! Encantounos e pasámolo xenial. Moitos parabéns!

Pinchade na imaxe para ver as fotos e vídeos da sesión.

FELIZ ANIVERSARIO!

 

FELIZ ANIVERSARIO!

 

25 N DÍA INTERNACIONAL CONTRA A VIOLENCIA DE XÉNERO

Esta semana realizamos diversas actividades relacionadas co 25 N, para rexeitar calquer tipo de violencia contra as mulleres. 

 Recortamos e engurramos  as siluetas para o mural colectivo que fixemos no colexio, representando así  a pegada que a violencia deixa nas persoas.

 Aprendemos a canción Ni una más, de Aitana, e preparamos unha coreografía con Aroa  para a estrofa que nos tocou. Canto traballamos para aprendela e que ben nos saíu!

 Tamén realizamos carteis co lema deste ano.

E hoxe participamos no acto colectivo no patio.

Pinchade na imaxe para ver fotos  desta conmemoración.

 E podedes ver máis na web do colexio

PROXECTO SADABONA: COÑECEMOS VENEZUELA

 Continuamos na nosa viaxe coñecendo os países de orixe dos nenos e nenas da clase. Hoxe visitáronnos os pais de Vicky, Raquel e Emilio, para achegarnos a Venezuela e ensinarnos as marabillosas riquezas paisaxísticas deste precioso país.

 Contáronnos a súa situación, como son o seu relevo e o seu clima, os lugares turísticos...e é que Venezuela, como din eles, o ten todo: praias, desertos, montañas, chairas, ríos, pontes, cidades e lagos.

 Tamén nos ensinaron moitas curiosidades, como o fenómeno meteorolóxico do Catatumbo, no que se producen máis de 28 raios por minuto; ou que no país atópase a araña máis grande do mundo. 

Non paramos de participar e facer preguntas!

E para finalizar, nada mellor que coñecer un dos xogos tradicionais máis populares de Venezuela, Ponlle o rabo ao burro, e  uns crebacabezas máxicos que nos encantaron.

 Pinchade na imaxe para ver as fotos da sesión e o ben que o pasamos.

Moitísimas grazas pola visita e parabéns por este precioso traballo  e a vosa colaboración!

PROXECTO SADABONA: COÑECEMOS AS PONTES

 Continuamos na primeira etapa do  PROXECTO SADABONA  coñecéndonos mellor a nós mesmos e ás nosas raíces.

 Hoxe contamos coa visita de Edu, o pai de Carmen e Nieves, que nos achegou á historia da mina e do lago de As Pontes, localidade moi importante para a súa familia. 

 Unha histoira apaixoante coa que realizamos unha viaxe no tempo desde a Prehistoria á actualidade, e coa que puidemos ver como se pode transformar unha paisaxe, pasando de ser un val a unha mina e rematar converténdose nun gran lago. 

 Tamén puidemos ver réplicas das máquinas xigantes que se utilizaban..

E, finalmente, Edu ensinounos como se pode utilizar a intelixencia artificial para crear imaxes como esta, na que vemos as distintas fases da transformación.

E claro, nós tamén quixemos crear algunhas imaxes coa súa axuda...

Pinchade na imaxe para ver fotos da sesión

 

E se queredes coñecer toda a historia podedes ver a súa presentación

DO T-REX A UN LAGO ARTIFICIAL

Moitísimas grazas por esta visita tan interesante e divertida!

 E parabéns por este gran traballo!

VISITA INTERCULTURALIDADE

 Hoxe visitáronnos cinco alumnos de 5º de EP para compartir connosco unha presentación sobre o seu traballo de interculturalidade.

Aprendemos con eles moitas cousas de diferentes países de forma lúdica.

 Moitas grazas Breixo, Fran, Gabriel, Marco e Joao!

Parabéns polo voso traballo!

PROGRAMA TEI: SOMOS DIFERENTES, PERO TEMOS COUSAS EN COMÚN

 Hoxe realizamos unha nova actividade do PROGRAMA TEI, Somos diferentes, pero temos cousas en común.

Partindo da curta Ratón en venta, traballamos valores como o respecto polas diferenzas dos demais. A finalidade é que o alumnado aprenda  que temos moitas máis cousas en común do que pensamos. 

 

Compartimos as nosas reflexións sobre a amizade, a tolerancia, a discriminación e a importancia de aceptar as diferenzas.

E despois fixemos unha dinámica na que tentamos descubrir algunhas cousas que temos en común.

 

Fixémolo xenial!

 

Podedes ver algúns momentos da actividade no seguinte vídeo

PROGRAMA TEI: O MONSTRO DE CORES

 Hoxe realizamos a actividade do PROGRAMA TEI O monstro de cores, que ten como obxectivo traballar o autodescubrimento e a colaboración.

A partires do conto e do vídeo, o alumnado aprendeu a identificar as cinco emocións básicas: ledicia, tristura, medo, carraxe e calma.

 Traballamos en grupos para facer as rodas das emocións, compartindo o que significaba cada unha para nós.

E rematamos coloreando monstros de cores que colocamos nun mural.

Pinchade na imaxe para ver as fotos da actividade

PROXECTO SADABONA: COÑECEMOS NICARAGUA

Dentro do PROXECTO SADABONA, hoxe visitounos Irys, a nai de Francis, para contarnos como é  Nicaragua, o seu país de orixe. 

Coñecemos curiosidades, a paisaxe, as súas preciosas praias,  o clima, comidas e traxes típicos, a artesanía... e ata nos ensinou os xogos que practicaba en Nicaragua de pequena. 

 Gustounos tanto que non paramos de facerlle preguntas sobre todo o que estabamos vendo.

Moitísimas grazas por compartir Nicaragua connosco e facernos a visita tan divertida e enriquecedora.  Parabéns!

Pinchade na imaxe para ver as fotos da sesión

FESTA DE MAGOSTO E SAMAÍN

Hoxe tivemos un día de festa no que houbo castañas, cabazas, disfraces e xogos, tamén compartidos cos nosos titores e titoras de 5º de EP.

PASÁMOLO XENIAL! 

Clicade na imaxe para ver algunhas fotos da xornada

E tamén podedes ver máis fotos e vídeos na web do colexio.